Ditën e sotme ish-minatorët kanë protestuar para Kryeministrisë për të kërkuar miratimin e statusit dhe rishikimin të pensioneve.
Teksa kërkesën ua drejtojnë disa institucioneve kryesore të vendit, ish-minatorët kanë paralajmëruar se do të vijojnë protestat.
Po ashtu, protestuesit kanë kërkuar dhe një takim me kryeministrin Edi Rama, por ky i fundit nuk ndodhet në zyrën e tij, pasi ka shkuar në Dropull për të inaguruar bustin e ish-kryeministrit grek, Konstantinos Mitsotakis.
“Ligjet në fuqi nuk u përpiqen nevojave të minatorëve, kërkojmë miratimin e statusit të minatorit. Është nevojë urgjente për mijëra minatorë që punojnë aktualisht apo janë në pension. Miratimi i tij i jep dinjitetin punës në minierë, i cili mungon prej kohësh. U drejtojmë kërkesa për takim kryeministrit. Kërkojmë përgjigje sa më shpejt. Bashkangjitur këtyre kërkesave kemi një draft të të drejtave që duhet të garantojë statusi i minatorit. Kemi më shumë se 11 mijë firma për këtë draft. Do të vazhdojmë protestat para parlamentit, e radhës është ditën e hënë në orën 16:30. Ftojmë të na bashkohen të gjithë ata që mbështesin këtë kauzë”, u shprehën ata mes të tjerash.
“I bëjmë thirrje që të ‘trazohet’ shteti. Ose të na fusin në burg më mirë. Ose të drejtën, ose jetën. “, tha një tjetër protestues.
