Ish-kryeministri i Kosovës, Ramush Haradinaj ka qenë në mesin e personave të helmuar në Deçan. Lajmi u bë me dije nga vetë ai, në një intervistë televizive, ku u shpreh se ka shfaqur disa probleme shëndetësore, por jo të rënda.
“Të them të drejtën kam pasur pak simptoma por jo të mëdha. Fëmijët e motrës Antigonës, po u prekën rëndë. Shumë të afërm. Nuk është diçka që shpjegohet si gjendje”, tha ai.
Sakaq, Haradinaj foli edhe për situatën në Deçan, për të cilën tha se është zvogëluar numri i personave që kërkojnë ndihmë mjekësore.
“Është zvogëluar numri i atyre që kërkojnë ndihmë mjekësore që jep shpresë se do të ndërpritet kjo gjendje. Situatë mjaft e çuditshme dhe jo e zakonshme. Sidomos dy ditët e para kanë qenë të rënda. I kam parë njerëzit duke vuajtur e veçanërisht ishte e dhimbshme t’i shohësh fëmijët duke vuajtur”, tha ai në ‘Kanal 10’ në Kosovë.
Numri i të helmuarve ka shkuar në mbi 1500 në Deçan, ndërkohë që është shpalllur gjendja e emergjencës. Shkaqet e helmimit nuk dihen ende, ndërsa paraprakisht u dyshua se shkak ishe uji, ku nga analizat rezultoi se janë identifikuar bakterie të cilat japin indikacione për kontaminim të ujit të pijshëm.
