Ish-drejtori i Partizanit dhe Kukësit, Dritan Dervishi, e vlerëson Skënderbeun si një klub model në Shqipëri nga i cili duhet të marrin shembull edhe të tjerët. Ai nuk i ka harruar kritikat që ka bërë në të shkuarën për korçarët, por shprehet se ata kanë mësuar nga gabimet dhe tashmë janë duke shijuar frytet e një pune serioze.Në një prononcim të dhënë për “Panorama Sport”, Dervishi komenton gjithashtu shortin që e vuri Skënderbeun përballë Dinamos së Zagrebit, duke e cilësuar atë si shumë të vështirë.
“Skënderbeu tregoi që është skuadra më e organizuar në Shqipëri. Për këtë një meritë të veçantë ka presidenti Takaj që me qetësinë që jep në klub është për t’u marrë shembull nga disa presidentë të tjerë.
Skënderbeu i kaloi situatat e vështira pas pezullimit nga Europa. Nga gabimet duhet të mësosh dhe jo të vazhdosh t’i bësh. Ata treguan që pa planifikim, program pune, reforma, nuk ka suksese.
Unë jam objektiv dhe them atë që mendoj. Kur Skënderbeu ishte për t’u kritikuar dhe për t’i vënë në dukje gabimet, gjithmonë kam folur haptazi dhe i kam kritikuar. Por korçarët janë njerëz inteligjentë. Shumë shpejt i kuptuan gabimet dhe iu përveshën punës për të arritur këto rezultate që po shijojmë të gjithë ne sportdashësit.
Në një kohë që te Partizani ka reformë çdo vit, te Kukësi megjithëse fitohet kampionati nuk ka qetësi me lojtarët që kërkojnë me ngulm largimin, te Skënderbeu punohet duke ruajtur qetësinë.
Mendoj qe shorti është shumë i vështirë, por i uroj Skënderbeut të besojë te mrekullia për të çuar lart emrin e Kategorisë Superiore”, u shpreh ai.
Në fund ish-drejtori bën edhe një kërkesë për futbollistët e Skënderbeut dhe për tifozët korçarë, kërkesë që ka lidhje me burgosjen e Ballist Morinës në Kroaci, shtetin nga vjen dhe kundërshtari në “play-off”.
“Doja të bëja edhe një kërkesë. Kur të luajmë kundër Dinamos së Zagrebit, lojtarët dhe tifozët të mbajnë veshur një bluzë ku të shkruhet “Liri për Ballist Morinën”. Kjo është një formë respekti për të gjithë ne shqiptarët kudo që jemi, pasi ai djalë përfaqëson shpirtin e shqiponjës. Ëndrrat mund të bëhen realitet”, përfundoi Dervishi.
