Ish-deputeti Mark Frroku që ndodhet prej më se një viti në burg, tani duhet të luftojë edhe për pasurinë. Gjykata ka vendosur në favor të kërkesës së prokurorisë për ti sekuestruar 7 apartamente, 2 garazhe, 2 dyqane dhe një sipërfaqe toke.
Frroku akuzohet për veprat penale të “Vrasjes me paramendim”, “Fshehjes së pasurisë…”, “Pastrimit të produkteve të veprës penale” dhe “Ndërtimit të paligjshëm”.
Ai po gjykohet në Shqipëri për akuzat se, në bashkëpunim, pasi dyshohet se ka vrarë një shtetas shqiptar në Belgjikë, në vitin 1999. Sipas hetimit të autoriteteve belge, të cilat përcollën aktet pranë Prokurorisë së Përgjithshme të Shqipërisë, Frroku dhe disa bashkëpunëtorë të tjerë kanë vrarë një bashkëkombësin e tyre, pas konflikteve për trafikun e prostitucionit.
Sipas organit të akuzës, ish-deputeti rezulton gjithashtu se është i dënuar nga Gjykata e Amsterdamit me 3 vjet burgim në vitin 2002, si i përshirë në veprimtarinë e paligjshme të trafikimit të lëndëve narkotike, duke përdorur emrin Piro Sofrani.
