Një ish-deputet indian i dënuar për rrëmbim dhe përballje me akuza për vrasje, është vrarë së bashku me vëllain e tij gjatë disa të shtënave që janë transmetuar drejtpërdrejt në TV.
Atiq Ahmed, një ish-deputet që po vuante një dënim të përjetshëm në burg, dhe vëllai i tij Ashraf Ahmed ishin në paraburgim policor jashtë një spitali në Prayagraj, në Indi, kur tre burra qëlluan më shumë se 20 herë mbi ta nga një distancë e afërt, ndërkohë që vëllezërit po merreshin në pyetje nga gazetarët.
Policia lokale bën me dije se dy vëllezërit kanë ndërruar jetë menjëherë në vendin e ngjarjes.
Oficeri i policisë Ramit Sharma tha se tre sulmuesit erdhën me motoçikleta duke u paraqitur si gazetarë dhe mbanin pajisje kamerash, një mikrofon me logon e një rrjeti televiziv dhe ID të rreme të gazetarit.
Sulmi, i cili ndodhi të shtunën në mbrëmje, u transmetua drejtpërdrejt në televizion nga disa gazetarë të pranishëm në vendngjarje.
Autorët e ngjarjes u vetëdorëzuan shpejt në polici pas të shtënave, ku njëri prej tyre brohoriste “Jai Shri Ram” ose “Hail Lord Ram”, një slogan që është bërë një thirrje beteje për nacionalistët hindu në fushatën e tyre kundër muslimanëve.
Sulmuesit quheshin Lavlesh Tiwari, 22, Mohit Puraney, 23, dhe Arun Kumar Maurya, 18 vjeç. Ata i treguan policisë se kishin ndjekur vëllezërit Ahmed për dy ditë, që kur u vunë në paraburgim dhe donin të kryenin vrasjet për të fituar famë./Opinion.al
