Kryetari i Komisionit të Ligjeve dhe deputeti socialist Ulsi Manja përmes një postimi në rrjetet sociale ka ironizuar Presidentin Ilir Metën për paralajmërimin e tubimit më 2 mars. Manja i shkruan me ironi; “Zoti President mos e dëgjo Ilir Metën dhe ti zoti Ilir mos e çmend Presidentin”.
“Zoti President mos e dëgjo Ilir Metën dhe ti zoti Ilir mos e çmend Presidentin! Gjeni gjuhën e bashkëpunimit sa më parë se mirë u bëtë gazi i botës, po po e bëni edhe Shqipërinë gazin e botës! Ju lutem, takohuni dhe ulni gjakrat, mos u kacafytni brenda të njëjtës kokë. Duhet qetësi!”-shkruan Manja.
Por, i menjëhershëm ka qenë reagimi i Zëdhënësit të Presidencës Tedi Blushi, i cili e fton Manjën në Presidencë që të marrë pjesë në konferencën e Metës për mediat, nga ku sipas tij, dhe do të mund t’i jap këshilla nga afër Metës. Blushi paralajmëron kryetarin e Komisionit të Ligjeve për fakte edhe më tronditëse se dosja “184” , ku pretendohet vjedhja e votave në Dibër.
“Ftohet zëdhënësi i Dosjes së Dibrës të marrë pjesë nesër në konferencën e radhës për shtyp në Presidencë, e madje të bëjë pyetje dhe debat para gazetarëve, jo vetëm si kryetar i Komisionit të Ligjeve dhe lider i reformës në drejtësi, por dhe si filozof i paparë që u shfaq sot. Me qetësi dhe drejtësi! Deri në 2 mars jemi të bindur se do bashkohesh me mbarë popullin kundër grushtit të shtetit. Se faktet e reja tronditëse do bëjnë të harrohet dhe Dosja 184. Presidenti të pret nesër në Presidencë, t’i dëgjojë këshillat e tua nga afër. Ai do të trajtojë me më shumë përulësi, se sa e trajtove ti në Komisionin Parlamentar. Të presim!”-shkruan Blushi./ Opinion.al
