19 marinarë iranianë kanë humbur jetën dhe 15 të tjerë janë plagosur, pasi një anije luftarake është goditur aksidentalisht nga predha e një anije tjetër, po iraniane, gjatë stërvitjeve.
Lajmi u konfirmua nga Marina e Republikës Islamike, e cila sqaroi se incidenti fatal ndodhi gjatë një stërvitjeje në Gjirin e Omanit, një rrugë detare tepër e nxehtë që lidhet me Ngushticën e Hormuzit, nëpër të cilën kalon një e pesta e naftës në botë.
Anija luftarake e cila u godit është prodhuar në Holandë, dhe është në funksion që nga viti 1988. Zakonisht ajo transporton një ekuipazh prej 20 marinarësh.
Ngjarja ndodhi në një kohë kur tensionet mes Iranit dhe Shteteve të Bashkuara mbeten të larta, që kur presidenti Donald Trump vendosi tërheqjen nga marrëveshja bërthamore që Irani kishte nënshkruar me fuqitë e mëdha./Opinion.al
