Irani refuzon të mbajë bisedime dypalëshe me Shtetet e Bashkuara, megjithatë është shprehur i gatshëm, që në rast të heqjes së sanksioneve, të angazhohet në bisedime shumëpalëshe, që do të përfshinin SHBA-në dhe nënshkruesit e marrëveshjes bërthamore të vitit 2015.
Duke folur në një seancë të hapur të parlamentit, presidenti iranian, Hassan Rohani, tha gjithashtu që Irani ishte i gatshëm të zvogëlojë përmbushjen e obligimeve nga marrëveshja e vitit 2015, nëse negociatat aktuale nuk arrijnë të japin ndonjë rezultat.
“Asnjë vendim nuk është marrë për të zhvilluar bisedime me SHBA-në. Ka pasur shumë oferta për bisedime, por përgjigja jonë do të jetë gjithmonë negative”, tha Rohani.
Shtetet e Bashkuara në vitin 2018 u larguan nga marrëveshja si dhe rivendosën sanksionet ndaj Iranit, ndërkaq Trump është shprehur i gatshëm të takojë liderët iranianë për bisedime pavarësisht presionit maksimal të Uashingtonit mbi Teheranin./Opinion.al
