Inteligjenca amerikane ka zbuluar se ushtria iraniane ka ngarkuar mina në disa anije në Gjirin Persik në qershor.
Sipas zyrtarëve amerikanë ky veprim po shihet si një shenjë se Irani po përgatitet të bllokojë Ngushticën e Hormuzit në përgjigje të sulmeve izraelite.
Veprimet e Teheranit erdhën menjëherë pas një sulmi me raketa të Izraelit më 13 qershor.
Ngushtica e Hormuzit është një nga rrugët më të rëndësishme të tregtisë globale të energjisë, përmes së cilës kalon rreth 20% e furnizimit botëror me naftë dhe gaz. Një bllokadë aty do të kishte pasoja serioze për ekonominë globale dhe çmimet e energjisë.
Pas bombardimeve amerikane më 22 qershor mbi tre objekte të programit bërthamor të Iranit, parlamenti iranian ka shprehur mbështetje për një masë të tillë.
Megjithatë, vendimi përfundimtar i takon Këshillit Suprem të Sigurisë Kombëtare të Iranit.
