Irani do të përgjigjet “ndaj çdo veprimi të armikut”, paralajmëroi sot kreu i Gardës Revolucionare, duke iu referuar tensionit në rritje me SHBA, gjatë një inspektimi të trupave të vendosura në një ishull të Gjirit.
“Ne jemi këtu sot për t’ju siguruar forcën tonë detare kundër kërcënimit të armiqve,” tha Gjenerali Husein Salami nga ishulli Amu Musa, sipas Sepahnews, faqja zyrtare e Gardës Revolucionare.
“Ne do t’i përgjigjemi me të njëjtën forcë çdo veprimi të armikut kundër nesh”, theksoi ai.
Ishulli Abu Musa ndodhet afër hyrjes së ngushticave të rëndësishme strategjike të Hormuzit, nëpër të cilat kalon një e pesta e prodhimit botëror të naftës, shkruan CNN.
Tensionet midis Iranit dhe Shteteve të Bashkuara janë përshkallëzuar ndërsa afron përvjetori i parë i vrasjes së gjeneralit të fuqishëm iranian Qassem Soleimani, shefi i operacioneve jashtë Gardës Revolucionare, i cili u vra në një sulm amerikan në Bagdad më 3 janar 2020 .
Irani ishte përgjigjur duke qëlluar me raketa në bazat irakiane ku ishin vendosur trupat amerikane.
Në fund të nëntorit, aeroplanmbajtësja “USS Nimitz” u vendos në Gji, ndërsa dy bombardues amerikanë B-52 fluturuan mbi zonë më 10 dhjetor, si një shfaqje e forcës.
Sipas New York Times, Sekretari i Mbrojtjes i SHBA Christopher Miller ka kërkuar kthimin e aeroplanmbajtëses, si një mesazh shtensionimi për Teheranin me qëllim shmangien e një përplasjeje, sipas gazetës, e cila citon një zyrtar amerikan.
Të enjten, Ministri i Jashtëm iranian Mohammad Javad Zarif akuzoi Presidentin në largim të SHBA Donald Trump për kërkimin e “një preteksti” për të filluar “një luftë” përpara se të largohej nga Shtëpia e Bardhë në 20 Janar./Opinion.al
