Kompania teknologjike Meta ka reaguar zyrtarisht pas thirrjes së qeverisë iraniane drejtuar qytetarëve që të fshijnë aplikacionin WhatsApp nga telefonat e tyre, duke pretenduar se po ndajnë informacione me Izraelin.
Përmes një deklarate zyrtare, Meta ka mohuar këto akuza, duke i cilësuar si të pavërteta dhe të rrezikshme.
”Jemi të shqetësuar se këto raporte të rreme mund të përdoren si justifikim për të bllokuar shërbimet tona, pikërisht në një kohë kur njerëzit kanë më shumë nevojë për to,” thuhet në deklaratë.
Sipas Metës, të gjitha mesazhet që përdoruesit i dërgojnë familjarëve apo miqve në WhatsApp janë të koduara nga njëri skaj në tjetrin.
“Ne nuk u japim informacion masiv asnjë qeverie. Prej më shumë se një dekade, Meta publikon raporte transparente që tregojnë rastet e kufizuara kur është kërkuar informacion nga WhatsApp”, ka sqaruar zëdhënësi i kompanisë.
Kujtojmë që ky reagim vjen pas sulmeve e tensioneve të larta mes Iranit dhe Izraelit.
