Sulmi ndaj dy femrave për mosmbajtjen e mbulesës, i filmuar nga kamerat e sigurisë së një dyqani ushqimor në Iran, bëri bujë. Viktimat u arrestuan së bashku me sulmuesin, i cili i kishte goditur duke i hedhur një kos.
Në videon e cila është bërë virale, dy kliente që ndodhen brenda një dyqani ushqimor në Shandiz, në verilindje të vendit, afrohen tek një burrë i cili fillon të flasë me ta.
Pastaj befas ai merr atë që duket të jetë një paketë kos nga një raft dhe i zemëruar ua hedh përmbajtjen në kokë. Por, ndryshe nga sa ka ndodhur në të kaluarën, pronari i dyqanit dhe një klient tjetër ndërhyjnë në mbrojtje të dy grave, duke përzënë sulmuesin.
Burri, shkruan agjencia e lajmeve Miran, u arrestua për prishje të rendit publik, por drejtësia iraniane urdhëroi gjithashtu arrestimin e dy grave të akuzuara për shfaqjen e flokëve të tyre në publik, një gjest i konsideruar i paligjshëm në vend. Agjencia Miran raporton se “paralajmërimet e nevojshme” i janë dhënë edhe pronarit të dyqanit për të siguruar respektimin e ligjit./Opinion.al
