Bajerni i Mynihut nis sot misionin “Champions” kundër rusëve të Rostovit. Trajneri italian Karlo Ançeloti do t’ua lehtësojë punën bavarezëve për të triumfuar hap pas hapi dhe të kapin finalen e Kardifit. Gjatë konferencës për shtyp, Ançeloti analizon kundërshtarin, flet për taktikën, zbardh disa pozicione në formacion, si dhe dëshmon mbi lidhjen e tij me Championsin.
Ançeloti, ju keni marrëdhënie të mira me Championsin. Si ka lindur kjo lidhje dashurie mes jush?
Në kohën e Milanit, Championsi ishte gjithmonë shumë i rëndësishëm dhe i veçantë. Kemi qenë gjithmonë të përqendruar. Për këtë arsye ekziston kjo lidhje. Unë e kam fituar tri herë dhe kam debulesë për këtë trofe.
Ju keni nevojë për lojtarë të shpejtë ndaj Rostovit. Çfarë roli do të luajë Doglas Kosta dhe Kimish?
Kosta mund të luajë, ndoshta edhe nga minuta e parë. Joshua Kimish do të startojë patjetër.
Çfarë mund të thoni mbi rivalin tuaj, Rostov?
Janë të organizuar shumë mirë në mbrojtje. Me thjeshtësinë më të madhe ndëshkuan Ajaksin. Duhet të luajmë shpejt dhe direkt me lojë vertikale. Sulmi duhet të gjejë hapësirat e duhura.
Si është situata e Boatengut, Robenit dhe Komanit?
Po stërviten me ne. Ndoshta do të aktivizohen javën e ardhshme. Edhe Komani nuk do jetë në stol. Duam të jetë gati për të shtunën në kampionat
Zëvendësimet pas minutës së 60të janë rastësi apo taktika juaj?
Normalisht unë nuk bëj kurrë zëvendësime në pjesën e parë. Në ndeshjen e fundit i bëra zëvendësimet në minutën e 60-të, sepse për mua ishte momenti i duhur.
A mund ta fitojë Bajerni Ligën e Kampioneve?
Kemi potencialin e duhur. Jam shumë i lumtur të kem një ekip të tillë. Por, në këtë kompeticion, duhet të japim gjithçka nga vetja. Në mars ose prill duhet t’i bëjmë mirë llogaritë, ndërsa tani do mendojmë ndeshje për ndeshje. Së pari duhet ta mbyllim grupin në vend të parë.
Pas ndeshjes ndaj Shalkes, ku duhet të përmirësohet Bajerni?
Mendoj se ne jemi në proces të vazhdueshëm në lidhje me përmirësimin. Duhet të përmirësojmë akoma më shumë intensitetin dhe organizimin e lojës. Por, jam i kënaqur. Kemi treguar mentalitet fituesi dhe kurrë nuk e kemi humbur organizimin.
Ju surprizoi humbja e Dortmundit?
E pashë ndeshjen dhe ishte interesante. Gjithashtu edhe dueli në Mainc. Çdo ndeshje mund të ketë surpriza në Bundesligë. Lajpcikun nuk e njihja, por për 90 minuta luajtën fort.
A mund të luajnë së bashku Riberi dhe Roben? Harmonizohen me njëri-tjetrin?
Mendoj se çdo lojtar cilësor duhet të luajë. Dhe lojtarët e mirë mund të luajnë së bashku. Ka gjithmonë një zgjidhje. Kjo vlen si për Riberinë dhe Kostën. Natyrisht s’mund të luajnë mbrojtës krahu, por mund të aktivizohen si mesfushorë apo sulmues krahu. Nuk është problem.
Sa e vështirë është t’i thuash një lojtari që nuk do të luajë?
Formacioni është vendimi më i vështirë për një trajner. Por, rrotacioni është pozitiv për dy arsye: të gjithë duhet të jenë të freskët dhe në formë; dua t’i aktivizoj të gjithë lojtarët.
