Sezoni futbollistik nuk ka përfunduar, por duket se aventura e Andi Lilës në kampionatin grek po. Me shumë mundësi, futbollisti i Kombëtares shqiptare do të luajë në Azerbajxhan duke nisur nga sezoni i ardhshëm. Mediat greke, por edhe ato azere shkruajnë se në drejtim të futbollistit ka pasur një ofertë konkrete, edhe pse emri i ekipit nuk bëhet i ditur. Duket se historitë me priftërinj dhe problemet e kohëve të fundit e kanë shtyrë 31-vjeçarin që të mendohet seriozisht për të ndryshuar skuadër.
Portali i njohur “sport24.az” është interesuar drejtpërdrejt te futbollisti i Kombëtares shqiptare dhe Lila ka pranuar ofertën. Ai thotë se skuadra, që e ka kërkuar, lufton për titull kampion dhe me gjasë do të jetë Karabaku i Agollit, ose Kabala. Kjo është intervista që ka dhënë Lila për portalin azerbajxhanas.
Flitet që keni marrë një ofertë interesante nga Azerbajxhani, është e vërtetë?
Po, është e vërtetë. Kam marrë një ofertë nga një klub në kampionatin tuaj. Megjithatë kam edhe opsione të tjera për të ardhmen time dhe, për këto arsye, jam duke u menduar mirë përpara se të marr vendimin.
Keni edhe oferta të tjera kaq ambicioze?
Po. Kam disa bisedime edhe me klube të superligës turke, por do të marr vendimin përfundimtar në fund të muajit prill. Atëherë do ta vendos të ardhmen.
Mund të na e thoni skuadrën që ju ka bërë ofertë?
Nuk është diçka e mirë për ta bërë të ditur në këto momente. Më mirë ta zbulojmë më vonë.
Çfarë synimesh ka ky ekip në kampionatin azerbajxhanas?
Është ekip që lufton gjithmonë për kampionat…
Flisni shpesh me Agollin?
Ai është shoku im më i ngushtë dhe ne flasim shpesh për futbollin në Azerbajxhan. Ansi e vlerëson kampionatin aty dhe më thotë që është bukur të luash.
Turqi apo Azerbajxhan?
Me shumë mundësi, Azerbajxhan. Këtu mund të ndodhin zhvillime interesante./ Panoramasport.al Gentjan Alimani
