Ministri i Brendshëm Sandër Lleshaj e ka konsideruar të rëndë grabitjen e Rinasit, por ka thënë se siguria kombëtare nuk mund të cenohet nga pesë grabitës. Ai e ka bërë këtë deklaratë gjatë interpelancës në Parlament, duke iu përgjigjur pyetjeve të deputetit të LSI-së Ralf Gjoni.
“Ngjarja e Rinasit është shumë e rëndë, pasi është episod i përsëritur. Kjo ngjarja ka marrë të gjithë vëmendjen e dukur të institucioneve të sigurisë, pavarësisht angazhimeve të tjera që ka pasur policia. Duhet të kemi parasysh se nuk është një ngjarje apokaliptike dhe siguria kombëtare e Shqipërisë nuk mund të cenohet nga një grup prej 5 grabitësish”, ka thënë Ministri i Brendshëm Sandër Lleshaj.
Më tej, duke dhënë sqarime për ngjarjen, Lleshaj ka thënë se siguria e aeroportit i është dhënë një kontraktori privat, gjë për të cilën ai është shprehur kundër.
“Vendimi për sigurinë e aeroportit është marrë në këtë Kuvend, para 15 vitesh, për t’ia dhënë një kontraktori privat. Unë nuk do ta kisha votuar kurrë. Ju e dini kush ka qëndruar këtu për 15 vite. Operatori ka njoftuar 5 minuta e 21 sekonda më vonë Policinë e Shtetit, pasi policia kishte marrë njoftimin ndërkohë në rrugë të treta. 6 minuta e 30 sekonda më vonë nga fillimi i ngjarjes, ka njoftuar Aeroportin. E ka njoftuar Aviacionin Civil Shqiptar 30 minuta pasi ka ndodhur ngjarja. Kontraktori privat i sigurisë së aeroportit nuk ka lënë Forcat e Ndërhyrjes së Shpejtë për të hyrë në aeroport. Është ngjarje e përsëritur. Perimetri i jashtëm i aeroportit është përgjegjësi e policisë, si çdo cep i vendit. Siguria brenda aeroportit është përgjegjësi e kontraktonit”, është shprehur Sandër Lleshaj gjatë interpelancës në Kuvend./Opinion.al
