Deputeti demokrat Myslim Murrizi ka vijuar interpelancën me Ministrin e Brendshëm Sandër Lleshaj. Murrizi tha se gjatë takimeve që ka pasur në komisariatin e policisë në Rinas, ka vënë re se është tërësisht jashtë standardeve dhe se koncesionari i ka kthyer përgjigje fyese dhe tallëse autoriteteve.
“Ai komisariat ishte i viteve ’70. Kishte 112 efektivë, 56 janë sportelistë, pra ata që presin qytetarët dhe 56 të tjerë ndahen në tre turne siç i keni ndarë ju dhe ruajnë perimetrin aq sa ju lejon koncesionari. Pashë korrespondencën, ku 4 shkresa të shefit të komisaritatit kishin marrë përgjigje fyese dhe tallëse nga TIA, pra “ç’ju duhet ju ajo punë?”. Unë prisja të thoshit se çfarë pune është bërë për kapjen e tyre, me thasë raportoi shefi i komisariatit, me thasë raportuat edhe ju. Të kujt bankave ishit? Te Raiffeisen, nga Nazeri, të Tirana Bank nga Octapus, dhe nga një bankë OPT që nuk e kisha dëgjuar, shoqëruar nga Anakonda. Kaq gjera duhet t’i dimë se janë paratë e shqiptarëve. Licencat e këtyre kompanive që marrin dhe dërgojnë para, i jepni ju. Ata nuk mund të shkojnë si fatorino dhe ikin pa u ngrit avioni në ajër, kanë përgjegjësi. Ju i kontrolloni këto kompani, çfarë qenka kjo arrogancë e kësaj kompanie? Kush jua ka vënë lakun në fyt që të mos anulohet kjo kontratë?”, ka thënë Myslim Murrizi.
Ndër të tjera, ai ka hedhur dyshimet se grabitja mund të ketë nisur nga brenda aeroportit, duke pasur informatorë. Murrizi ka kërkuar që të arrestohen edhe përgjegjësit që nuk i kanë hapur derën Forcave të Ndërhyrjes së Shpejtë, të cilët rastësisht kishin qëlluar në atë moment aty.
“A keni ju informacion kush punon në Aeroport, këta që i heqin rripin e pantallonave qytetarëve, që i heqin fasulet, që i marrin celularët? Unë dyshoj se grabitja mund të ketë nisur nga brenda, ju a keni informacion? Kush është kjo kompani që nuk i hap derën FNSH-së? Pse nuk arrestoni ata të kompanisë, që tallen me shtetin? Ju arrestoni fukarenjtë për 30 mijë lekë”, tha Murrizi duke kërkuar zyrtarisht që t’i hiqet koncesioni kompanisë nëpërmjet një ligji që do të votohet në Parlament./Opinion.al
