Nëse dikush i thërret kujtesës do të kujtohet se ata janë djemtë dhe vajzat që në muajin maj i kënduan ish-kryeministrit Sali Berisha, në plazhin e Lalëzit në Durrës, Internacionalen e famshme, himnin revolucionar të socialistëve dhe të komunistëve në mbarë botën. Janë po këta të rinj dhe të reja, të cilët të hënën qëlluan me vezë kundrejt kryeministrit Rama, ndërsa ky i fundit dilte nga takimi i zhvilluar në ambientet e Fakultetit të Shkencave Sociale. Të rinj të lidhur nga dy grupime të ndryshme por që i bashkon kauza për një universitet publik të shëndoshë por që në vetvete përqafojnë ideologjinë e majtë, por siç thonë ata duke qenë politik por jo partiak. Grupimi i parë me studentë nga Kosova quhet Klubi Politik i Studentëve. Edhe pse nuk pranojnë ti përkasin ekstremitetit të majtë, ky grupim shfaq tendenca të hapura të përqafimit të ideve bolshevike. Gjë që vihet re edhe në foton kryesore në profilin e tyre ku dallohen dy të rinj të bashkuar me grushtin lart e shoqëruar nga kënga ‘E drejta të jetosh në paqe” e kantautorit kilien Victor Jara, i vrarë nga regjimi i Pinochetit, apo edhe simboli I grushtit të kuq, i shpërndarë kudo në muret e qytetit të Prishtinës. Edhe pse thonë se nuk kanë lidhje me Levizjen Vetëvendosja, kërkesat dhe format e protestës së tyrë duket se kanë të njëjtën përqasje me lëvizjen e drejtuar nga Albin Kurti. Të njëjtën ideologji shpërndan edhe grupimi “Lëvizja për Universitetin”, pjesëmarrëse në disa aksione më të hershme brenda dhe jashtë auditorëve, e cila simbolin e saj ka Lapsin shtrënguar fort nga grushti i kuq. E cila ka edhe gazetën “Universitari” e cila mbështetet nga “Olaf Palme International Centre”, organizatë për lëvizjen punëtore suedeze, e cila lufton për demokraci, të drejta humane dhe paqe.
