Tifozët e Interit duket se janë vërtet të tensionuar për të ardhmen e Mauro Icardit në klubin zikaltër. Argjetinasit iu hoq shiriti i kapitenit pak ditë më parë pas një vendimi të drejtuesve dhe të gjithë mendojnë se fajin për këtë e ka bashkëshortja, njëkohësisht edhe menaxherja e tij, Uanda Nara.
Sipas asaj që raporton “Gazzeta dello Sport”, makina e saj është sulmuar me gurë nga disa tifozë ndërkohë që po futej në autostradë në zonën e San Siros. Fëmijet e çiftit ishin gjithashtu në makinë por për fat të mirë incidenti u mbyll pa shkaktuar lëndime.
Tifozët e Interit kanë sulmuar Narën gjithashtu në rrjetet sociale dhe e akuzojnë se po luan në kurriz të Interit për t’i siguruar Ikardit një kontratë të majme në një klub tjetër.
Aludimet janë të shumta dhe drejtuesit zikaltër vijojnë të këmbëngulin në media se negociatat për rinovimin e kontratës me Icardin do të vazhdojnë, por duket se lidhja e sulmuesit argjentinas me Interin është këputur me heqjen e shiritit dhe vështirë se do të mund të riparohet. Duket se tani shpresa e vetme e zikaltërve është që Icardi të japë më të mirën deri në fund të sezonit dhe të ndihmojë ekipin për t’u renditur në Champions./E.M
