Moratti, doni të ktheheni si president i Inter-it? Kjo është pyetja që Suning i ka drejtuar ish-numrit një të zikaltërve dhe kjo është përgjigja që Moratti ka dhënë para gazetarëve italianë. “Ma kanë kërkuar, nëse doni ta dini… Të jesh president është një nder, por nuk di se çfarë t’i përgjigjem. Kam nostalgji për njerëzit, për tifozët”. Atëherë, është një po, apo një ndoshta? Mbetet akoma i pazgjidhur ky problem në strukturën drejtuese të Inter-it. Ai i të pasurit një president prezent. Një domosdoshmëri absolute.
“Erick Thohir, – ka shtuar Moratti, – ka provuar të bëjë blerje pavarësisht problemeve që kanë dalë në menaxhim e një lodre që ka rezultuar të jetë më e madhe nga sa parashikohej. Me kinezët ndihem i sigurt, dëshira e tyre është të kenë sukses”. Dhe në lidhje me Frank de Boer dhe me durimin e treguar nga pronarët e rinj: “Nuk mund ta largonin mbas një ndeshjeje, nuk janë të gjithë si… Më duket i aftë, shumë i vlefshëm për ekipin; shpresoj që të arrijë rezultate pozitive. Diego Simeone ka dëshirë të kthehet? Do të ishte një kthim i madh, është një internist i zjarrtë dhe një trajner shumë i mirë. Por do të ishte një gabim për De Boer, që, nëse ka rezultate, nuk mendoj se do të largohet. Ka kohë për ‘Cholo’-n”, ka thënë Moratti.
