Në një konferencë për mediat me zv/ kryeministrin, Arben Ahmetaj, ministrja gjermane për Europën, Anna Luhrmann është pyetur nga gazetarët se a është Gjermania pro ndarjes së Shqipërisë nga Maqedonia e Veriut në procesin e integrimit.
Anna Luhrmann u shpreh se ka marrë sinjale pozitive nga Bullgaria për zgjidhjen e ngërçit me Maqedoninë e Veriut dhe sipas saj kjo do të ndihmojë në ecjen përpara të procesit të integrimit.
“Që prej marrjes së detyrës së re në bisedat e mia në Bruksel, e kam diskutuar këtë çështje që të ecim përpara në nisjen e bisedimeve me Maqedoninë e Veriut dhe Shqipërisë, muajin e ardhshëm ne do e diskutojmë në forumet në Bruksel, dhe në të ardhmen e afërme do bëjmë përpara në këtë drejtim.
Për ne ka rëndësi që të ecim sa më shpejt në këtë rrugë në nisjen e negociatave për Shqipërinë dhe Maqedoninë e Veriut, kemi marrë sinjale pozitive dhe nga Bullgaria që të gjejmë në një moment sa më të afërm për një zgjidhje sa më të përshtatshme”, tha Luhrmann./Opinion.al
