Deputeti i Partisë Demokratike, Ervin Salianji, këtë të martë ka deklaruar se pavarësisht se kishin kaluar 15 ditë nga kërkesa e tij drejtuar SPAK për të marrë informacion lidhur me çështjen “McGonigal’, ende nuk ka marrë asnjë përgjigje zyrtare.
Në një deklaratë për mediat nga kryesia e Kuvendit, deputeti hodhi akuza ndaj institucioneve si SHISH, SPAK dhe Ministria e Brendshme për të cilat tha se janë vendosur në shërbim të kryeministrit Rama.
Deputeti tha se ministria e Brendshme në përgjigjen e kthyer sqaronte se asnjë zyrtar i kësaj dikasteri nuk kishte pasur takime me ish zyrtarin e lartë të FBI-së. Ndërsa sa i takon kërkesës së bërë ndaj Shërbimit Informativ Shtetëror për informacion mbi ish zyrtarin e FBI-së, Salianji tha se në përgjigjen e kthyer, thuhet se ky institucion i përgjigjet vetëm kryeministrit Edi Rama.
“Prej një muaji të gjithë mediat ndërkombëtare kanë vendosur në fokus aferën Rama-McGonigal. Të gjitha institucionet për shkak të frikës ndaj Ramës kanë frikë të kthejnë përgjigje. Në Kuvend me urdhër të Ramës është bllokuar kërkesa për ngritjen e një komisioni hetimo, janë bllokuar prej një muaji kërkesa për nocion me debat dhe kërkesa për interpelancë urgjente nga frika e Edi Ramës. Institucionet janë vendosur në shërbim të tij. Po i përdor si kamzhik për të goditur kundërshtarët politikë.
SPAK, SHISH, dhe Ministrisë së Brendshme u janë dorëzuar disa kërkesa për informacion. Ministria ktheu përgjigjen se ministri i brendshëm apo zyrtarë të tij nuk kanë pasur asnjë takim me ish-zyrtarin e FBI-së. Shkresa dërguar SHISH tregon se SHISH është i kapur nga kryeministri thotë se i përgjigjet vetëm kryeministrit. SPAK me keqardhje të plotë, edhe sot e kësaj dite nuk ka fuqi të kthejë përgjigje sipas ligjit. Kur si kthen përgjigje një deputeti të Kuvendit në zbatim të ligjit imagjinoni për një qytetar të këtij vend. Inkurajoj SPAK, por ne presim përgjigje për këtë çështje”- tha Salianji.
