Kryeministri i Kosovës, Albin Kurti, në një konferencë për media këtë të dielë, pas tensioneve te regjistruara në veri të Kosovës, ka akuzuar Serbinë se dëshiron të kthehet në kohë lufte ndërsa u ka bërë thirrje qytetarëve serbë në Kosovë që të distancohen nga regjimi i presidenti serb Aleksandër Vuçiç.
Pas mbledhjes së Këshillit të Sigurisë, Kurti theksoi se qeveria e Kosovës është qeveria e paqes që kërkon ta ruaje sigurinë pa dallim feje e etnie moshe e gjinie.
“Ftoj të gjithë serbët në Kosovë të punojnë, jetojnë e qeverisin bashkë me ne. Serbia dëshiron kthim në kohe lufte, ne dëshirojmë të ardhme demokratike prosperuese e europiane. Qytetarët serbë në Kosovë, nuk duhet të pranojnë të kthehen në kohë të shkuara. Kohërat e shkuara të ngelen në të kaluarën. Serbët e Kosovës duhet të distancohen nga grupet kriminale dhe regjimi i Vuçiçit që po i financon dhe i drejton dhe po kërkon luftë në luftë. Ne jemi qeveria e paqes që dëshiron ta ruajë sigurinë pa dallim feje e etnie moshe e gjinie”-tha Kurti.
Ndër të tjera kreu i qeverisë së Kosovës tha se institucionet e Kosovës janë në gatishmëri të plotë.
“Më shumë vigjilencë e gatishmëri në institucionet e Kosovës në mënyrë që të mundësohet vendosja e paqes e sigurisë dhe ligjshmërisë e kushtetutshmërisë”-vijoi Kurti.
