Shkalla zyrtare e papunësisë në Shqipëri për popullsinë mbi 15 vjeç arriti në 8,8% në tremujorin e fundit të vitit 2024 duke shënuar një ulje me 0.8 pikë përqindje në krahasim me një vit më parë.
Megjithatë krahasuar me tremujorin e mëparshëm papunësia u rrit me 0.7 pikë përqindje.
Sipas INSTAT të dhënat e Anketës Tremujore të Forcave të Punës reflektojnë edhe ndryshimet demografike që u evidentuan ne censin e fundit.
“Ndryshimet në tregues janë reflektim i dinamikave ekonomike dhe sociale të vendit si dhe i rishikimit të metodologjisë bazuar në të dhënat më të fundit demografike”, tha Elsa Dhuli, Drejtore e Institutit të Statistikave.
Krahasuar me tremujorin e mëparshëm, në tremujorin fundit të 2024-ës, punësimi për popullsinë mbi 15 vjeç u ul me 1,7%. Sektorët specifike treguan një rënie prej 2,3% në bujqësi, 0,9%% në shërbime dhe 2,4% në industri.
“Në tremujorin e katërt 2024, shkalla e punësimit për popullsinë 15-64 vjeç është 68,3 %, duke shënuar një rritje vjetore me 1,6 pikë përqindje dhe një rënie tremujore me 0,8 pikë përqindje”, tha Dhuli.
Ndërsa për të rinjtë 15-29 vjeç, shkalla e papunësisë është 19,1%; kjo tregon një përmirësim prej 2,1 pikë krahasuar me tremujorin e katërt të vitit të kaluar, por edhe një rritje prej 1,4 pikë krahasuar me tremujorin e tretë të vitit 2024.
Tv Klan
