Kreu i PD, Sali Berisha në një dalje për mediat këtë të hënë ka komentuar edhe vendosjen e 21 kamerave të sigurisë në qytetin e Shkodrës. Sipas Berishës, kjo ngjarje është dëshmi se qyteti është nën sundimin e mafies.
Berisha ndër të tjera tha se jo vetëm në Shkodër është vendosur një sistem kamerash të specializuara nga organizatat kriminale, por thekson ai e njëjta gjë ndodh edhe në Vlorë, Elbasan e në Korçë, kudo jemi të filmuar.
‘Mafia është ajo që sundon kudo. Krimi është ai që vendos. Ai ka bajlozët e tij, të përfaqësuar me Edi Ramën në qeveri. Krimi ka përfaqësues në parlament me Ballën e Gjiknurin. Krimi ka përfaqësues Erion Veliajn në Bashkinë e Tiranës.
Krimi vendos kudo. Njëlloj si në narko-shtetet më të konsoliduara në histori, në Amerikën Latine, rrugët, sheshet e qyteteve tona janë të vendosura tërësisht, në çdo metër katror në kontrollin e syrit të ciklopit. Kamerat e vendosura nga organizatat kriminale, të cilat bashkëpunojnë ngushtë me segmentet e tyre në polici dhe institucionet e tjera.
Vendosja e Shkodrës në një sistem kamerash të specializuara nga organizatat kriminale, është dëshmia më flagrante e gjithë fuqisë së mafias në këtë vend. Mendoni ju se është vetëm Shkodra? Absolutisht jo. Është çdo pjesë e këtij territori. Shkoni në Vlorë, nisuni në Elbasan, në Korçë, kudo jeni të filmuar.’- tha Berisha.
