Ish-drejtori i Arkivave në Ministrinë e Brendshme, Kastriot Dervishi, publikoi një ekstrakt bisedash nga një mbledhje të Sekretariatit të KQ të PPSH-së, mbi numrin e lartë të deleve të zeza në tufën e Progonatit, Tepelenë.
Në mbledhjen në fjalë merrnin pjesë: Enver Hoxha, Ramiz Alia (sekretar i KQ), Adil Çarçani (kryeministër), Besnik Bekteshi (zëvendëskryeministër), Harilla Papajorgji (kryetar i Komisionit të Planit).
Mbledhja mbahej për problemin e mishit. Që kishte kohë që ishte zhdukur nga tregu si mall normal dhe jepej vetëm me miqësi ose me kufizim e me tallona.
Nga ekstrakti i bisedës nuk kuptohet vetëm niveli i njohurive në ekonomi të ish-udhëheqjes komuniste, por ajo që bie më shumë në sy është mediokriteti i tyre të një shkalle sipërore.
Jo më kot, komunizmi, anën kriminale të tij e ka të lidhur ngushtë me ekonominë e dobët.
Mirëpo gjatë bisedës së kupolës komuniste të kohës, del në pah edhe dilema shekspiriane: Pse ka më shumë dele të zeza se të bardha në tufën e Progonatit?
Diktatorit Hoxha i kishte bërë përshtypje shumë një fakt i tillë, ndërsa kishte ndjekur një dokumentar në TV rreth kësaj tufe.
Ajo çfarë merr pastaj nota humori dhe injorance është ideja për të kuptuar rëndësinë e deleve të zeza nga ato të bardhat.
Pasi kishte mbetur i befasuar, diktatori pyet nëse delet e zeza kanë ndonjë ndryshim nga ato të bardhat.
Pjesa tjetër e ekstraktit që vijon më poshtë është një tragjiko-komedi në vete për të kuptuar nivelin e atyre që kanë drejtuar Shqipërinë.
Pjesë nga debati në Sekretariat
Shoku Besnik Bekteshi
Me gjithë dëborën e madhe…edhe me blegtorinë jemi mirë në këtë periudhë.
Shoku Adil Çarçani
Lindja e qengjave deri tani ka shkuar normalisht, dëmet kanë qenë të pakta.
Shoku Enver Hoxha
Tani që përmende qengjat, mu kujtua një emision që pashë mbrëmë në televizor. Paraqiste një tufë delesh e qengjash. Te kjo më bëri përshtypje numri i madh i deleve të zeza. Qengja dhe dele të zeza ka, por tek-tuk, kurse në atë tufë kishte shumë. Pse nuk i shtojmë ato? Kanë ndonjë ndryshim nga delet e bardha?
Shoku Adil Çarçani
Ndonjë ndryshim në prodhimtari ose cilësinë e qumështit e të mishit nuk kanë, por që kur janë shtuar racat e bardha, të zezat janë duke pakësuar.
Shoqja LenkaÇuko
Përmirësimi racor e ka prishur delen e zezë.
Shoku Enver Hoxha
Po e prishur ka qenë ajo, se gjithmonë rrallë ka pasur dele të zeza, kurse në tufën që paraqiti mbrëmë televizori, kishte shumë të tilla.
Shoku Ramiz Alia
Unë kur e pashë, mendova mos kishte ndonjë defekt gjatë transmetimit, aq të errëta ishin figurat në ekran, pastaj vura re që delet ishin të zeza.
Shoku Adil Çarçani
Në atë emision bëhej fjalë për tufën e Progonatit dhe më bëri përshtypje sa ishin rritur qengjat…Kooperativa bujqësore e Progonatit ka dalë me disa tregues jashtëzakonisht të mirë në blegtori, shoku Enver. Ata ju kanë dërguar një letër, me të cilën ju njoftojnë arritjet e tyre. Për këtë më tha në telefon, sekretari i parë i Rrethit të Tepelenës.
Shoku Enver Hoxha
Kam dhënë porosi t’u bëjnë ndonjë letër përgëzimi në emrin tim, se u vjen mirë lebërve.
Shoku Adil Çarçani
Mirë do ishte se e duan delen ata, janë të lidhur ngushtë me bagëtinë e imët, qengjat e kecat e vegjël i marrin dhe i mbajnë afër zjarrit derisa të kalojnë periudhën e vështirë pas lindjes, tamam si fëmijët.
Shoku Enver Hoxha
Posi, këtë e kanë në traditë ata.
