Një tjetër rast është denoncuar ditën e sotme nga vajza e një pacienti të infektuar me COVID-19, teksa pretendon se i kishin humbur sendet personale të babait të saj të shtruar tek Infektivi.
Në një dalje për mediat ajo shprehet se i kanë dhënë vetëm varësen ndërsa portofolin dhe unazën e tij nuk i ka gjetur.
Sipas denoncueses në momentin kur ka shkuar për t’i tërhequr sendet personale të të atit, personeli shëndetësor i ka thënë se ia kanë çuar te spitali COVID-3 ndërsa më pas i është thënë se i ka marrë vajza.
“Unazën e këna këta këtu. E kanë marrë dje nga Infektivi e kanë çuar te COVID3. Atje më dhanë vetëm varësen. Nuk e di babi kishte portofolin më tha e kam me lekë. Dje erdha me e marrë ajo nuk m’i dha se thotë shoqe nuk ke kartën e identitetit.
Sot më tha i ka marrë goca. Unë nuk i kam marrë dje. Varësen e mora me fotografi. Tani portofolin dhe unazën ta gjejnë këta këtu.
Dje fola me një kryeinfermiere Zana. Erdha sot në mëngjes më thanë i kemi çuar atje.”, shprehet ajo fillimisht.
Pasi gruaja ka bërë denoncimin dhe në polici dhe në media, për 30 minuta i janë gjetur portofoli me para dhe sendet personale dhe spitali Infektiv ia ka kthyer.
Sipas deoncueses, në kallëzimin në polici ka denoncuar koordinatoret, të cilat, thotë ajo, janë personat përgjegjës. Prej 24 orësh ajo thotë se ka marrë vetëm një herë informacion dhe nuk e di si është gjendja.
“Pastaj kur denoncova mi gjetën. Asgjë s’më thanë, merri ja ku i ke sendet dhe kaq. Nuk lajmëronin këto. Më thanë i ke atje, atje më thanë i ke këtu. As ushqimet që i kemi sjellë dje nuk i ka marrë. Koordinatorja i kishte thënë e ka marrë e bija tek COVID 3, e bija jam unë, por nuk i kam marrë”, deklaroi gruaja. /Opinion.al
