Kryeministri indian Narendra Modi tha se Nju Delhi ishte i përkushtuar të përmirësonte lidhjet me Pekinin në një takim të rëndësishëm me presidentin kinez Shi Xhinpin, të dielën, teksa të dyja vendet u zotuan të lenë mënjanë dallimet pas vitesh tensione kufitare.
Modi viziton Kinën për herë të parë në 7 vjet, për të marrë pjesë në një takim dy ditor të organizatës së bashkëpunimit të Shangait, së bashku me presidentin rus, Vladimir Putin dhe udhëheqës të tjerë të Azisë Qendrore, Jugore dhe Juglindore dhe po ashtu të lindjes së mesme, në një shfaqje të solidaritetit të jugut botëror.
“Interesat e 2.8 miliardë njerëzve në të dyja vendet janë të lidhura me bashkëpunimin tonë. Ne jemi të përkushtuar t’i çojmë përpara marrëdhëniet tona mbi bazën e besimit, respektit dhe interesave të ndërsjellë”.
Takimi bilateral u zhvillua 5 ditë pasi Uashingtoni vendosi tarifa prej 50 përqind ndaj produkteve indiane, si masë ndëshkimore për blerjen e naftës ruse nga Nju Delhi.
Analistët thonë se Shi dhe Modi po përpiqen të projektojnë një front të bashkuara kundër presionit perëndimor. Modi theksoi se një atmosferë paqeje dhe stabiliteti ishte krijuar në kufirin e kontestuar të Himalajeve, zonë tensionesh te thella mes dy vendeve pas përplasjes vdekjeprurëse të trupave në 2020, që pezulluan bashkëpunimin në shumicën e fushave për rivalët strategjikë bërthamor.
Sipas Modit një marrëveshje ishte arritur mes dy vendeve për menaxhimin e kufirit, edhe pse nuk dha detaje të mëtejshme. Po ashtu, siç njoftoi janë rivendosur edhe fluturimet direkte mes Kinës dhe Indisë pas pezullimit 5-vjeçar. Riafrimi i Pekinit me Nju Delhin është një goditje për Uashingtonin, I cili për dekada ka kultivuar lidhje me Indinë me shpresën se kjo do të shërbente si kundërpeshë rajonale ndaj Kinës.
