Një aksion masiv ka nisur në qytetin e Elbasanit dhe vetë Drejtori i Përgjithshëm i Policisë Haki Çako ka shkuar atje që në orët e para të mëngjesit. Disa makina janë bllokuar, midis tyre dhe makina luksi, sikurse janë shoqëruar disa persona të dyshuar me precedentë penalë. Në aksion merr pjesë FNSH dhe RENEA.
Ky operacion policor i këtyre përmasave vjen 3 ditë pas incidentit në qytetin e Elbasanit kur një autoveturë e blinduar goditi mjetin e nëndrejtorit të policisë së qarkut, teksa ky i fundit dhe disa efektivë po shoqëronin një mjet luksoz të dyshuar si të trafikuar në vendin tonë.
Policia ndaloi disa persona, ndërsa sekuestroi disa mjete të blinduara në pronësi të biznesmenit Petrit Çela. Policia dha pak detaje për ngjarjen për të cilën nisi hetimet edhe Prokuroria e Krimeve të Rënda, ndërkohë që një reagim erdhi direkt nga kryetari i Partisë Demokratike i cili tha se kriminelët në Elbasan kanë mbështetjen e Ramës dhe të kryebashkiakut Qazim Sejdini.
