Policia e Shtetit deklaron se votimi në Shëngjin po vazhdon normalisht dhe se nga të shtënat me armë s’ka asnjë të plagosur. Policia thotë se në vendin e ngjarjes është gjetur një gëzhojë dhe thotë se ngjarja ka ardhur pas një zënke të çastit, pa përmendur aspak si shkak votimet në këtë qytet bregdetar. Nga ana tjetër LSI deklaroi se bandat e PS qëlluan mbi militantët e LSI vetëm se qendronin para qendrës së votimit. Drejt Lezhës është nisur edhe Meta i cili tha se “Bandat e droges nuk mund te mbajne peng Shqiperine”.
Njoftimi i policisë
Sot rreth orës 10:15 është marrë njoftim se në rrugën kryesore midis shkolles 9- vjeçare Shëngjin dhe lokal “Restorant Detari” në Shëngjin ka patur të shtëna me armë zjarri.
Menjëherë në vendngjarje kanë mbërritur shërbimet policore ku nga kqyrja e vendit të ngjarjes është gjetur dhe sekuestruar 1 gëzhojë.
Tek spitali nuk ka mbërritur asnjë person për ndihmë mjekësore.
Nga hetimet paraprake dyshohet se konflikti ka qenë i çastit midis shtetasit F.D. 27 vjeç, dhe personave të tjerë për të cilët po punohet për identifikimin e tyre.
Në bashkëpunim dhe koordinim me Prokurorinë e Rrethit Gjyqësor Lezhë , vazhdojnë hetimet për zbardhjen e motiveve dhe rrethanave të ngjarjes.
Proçesi i votimit vijon normalisht.
