TIRANË- Avokati Altin Goxhaj ka publikuar sot një intervistë me punonjësen e Bashkisë së Tiranës e cila u shkarkuar nga puna dhe sipas disa mediave ka pasur edhe një incident me kryetarin Veliaj. Goxhaj thotë se do të jetë avokati i zonjës Violeta Ndue Geca në gjykatë, gjithashtu boton intervistën dhe fotot e saj.
Sipas saj, incidenti i parë ka ndodhur në 22 Shtatornë aktivitetin “Një ditë pa makina”, ku pretendon se disa djem shokë të Erjon Veliaj e kanë dhunuar dhe për këtë ka bërë edhe denoncim në polici. “Shoku i dhunuesit (I cili është në kërkim nga policia me emrin Artur dhe është titullar në një institucion shtetëror)”, thotë Violeta në invervistën me Goxhajn.
Po sipas Violetës, të premten në mëngjes, në 25 shtator i ka shkuar njoftimi nga Veliaj për pushim nga puna. Ajo pretendon se në sekretarinë e zyrës së Kryetarit Veliaj ka pasur edhe një përplasje fizike me të. “Erdhi Erioni duke më bërtitur që tashmë unë jo vetëm do të pushohesha nga puna por “do të zhdukesha fare… më kapi në të njëjtin krah që e kisha plagë nga dhuna e shokut të tij 3 ditë më parë. Aty duke qarë, nuk durova dhe e shtyva fort me të dyja duart në fytyrën që ma kishte sjellë 5 cm larg meje dhe ai i shpërfytyruar ngaqë nuk e priste, instiktivisht më gjuajti me grusht mbrapa kokës dhe më kapi për flokësh dhe njëkohësisht m’u sulën edhe sekretarja, shefja e kabinetit dhe këshilltarja”.
Nga ana tjetër, Bashkia e Tiranës ka hedhur poshtë këto akuza dhe e cilëson ngjarjen të stisur. “
Tensionet artificiale të ngritura nga opozita në mbledhjen e fundit të Këshillit Bashkiak e të amplifikuara në thashetheme konfrontimesh, nuk kanë asnjë bazë e nuk ndihmojnë asnjë kauzë për qytetin”, thuhet në njoftimin e Bashkisë.
