Një incident i përgjakshëm ndodhi sot në Lezhë, në qendrën e votimit të vendosur pranë shkollës 9-vjeçare të Shëngjinit. LSI ka deklaruar se është sulmuar nga eksponentë të armatosur të PS ku për pasojë ka mbetur i plagosur Florian Dushku, aktivist i LSI-së i cili është transportuar në spital jashtë rrezikut për jetën. Ndërkohë policia ende nuk ka dhënë asnjë informacion për ngjarjen, edhe pse në pamjet televizive shihen ekspertë të krimit në vendin e ngjarjes.
Në tentativë për të mësuar më shumë rreth këtij incidenti, më i rëndi i shënuar në ditën e zgjedhjeve, Opinion.al komunikoi me një dëshmitar në vendin e ngjarjes.
Ai është Gjovalin Tusha drejtor i portit të Shëngjinit, i zgjedhuri i LSI-së.
Tusha u shpreh se “persona të armatosur zbritën nga makinat pa targa, njëra prej tyre me logo të Rilindjes dhe kërcënuan një person që rrinte pranë qendrës së votimit. Ne u mblodhëm aty 5-6 dhe kërkuam të sqaroheshim por ata qëlluan me kallashnikov dhe pistoleta duke kërcënuar: Mos qendroni këtu, largohuni nga qendra e votimit!. Kemi parë vdekjen me sy, na u duk vetja si në Irak. I bëjmë thirrje ministrit të Brendshëm dhe Kryeministrit të ndalë gjakderdhjen. Të mos përgjakë këtë ditë të shenjtë. Rama të largojë bandat”. /Opinion.al
*Pamjet ne vendin e ngjarjes
