Ka patur një të papritur votimi i sotëm në parlament për dekretet e Presidentit për shkarkimin e 4 ministrave dhe emërimin e 4 të rinjve. Në momentin kur kryesuesja e seancës, Valentina Leskaj ka hedhur në votim shkarkimin e z. Blendi Klosi numri i votave ka rezultuar të jetë 70 nga 71 që janë të nevojshme.
Kjo ka kaluar pa u vënë re nga znj. Leskaj, por jo nga Gramoz Ruçi. Kreu i grupit socialist ka marrë fjalën dhe i acaruar u ka kërkuar deputetëve të PS të kthehen në sallë pasi për shkak të mungesës së tyre nuk ka qenë kuorumi i nevojshëm për shkarkimin e ministrit.
Më pas votimi për shkarkimin e Klosit dhe emërimin e Xhaçkës u përsërit në sallën e parlamentit. Deputetët e PS u kthyen në sallë dhe votuan me 76 vota pro shkarkimin e Klosit dhe po me 76 vota emërimin e Xhaçkës si ministre e Mirëqenies Sociale.
Gjatë seancës së sotme është vënë re mungesa e kreut të Kuvendit Ilir Meta dhe n/kryetarit Shpëtim Idrizi. Por gjithsesi, votat e deputeteve të tyre, pra të LSI dhe PDIU kanë shkuar pro ministrave të rinj.
/Opinion.al
