Zv. Kryeministrja Ledina Mandija njofton se do të mbledhë sot në orën 15:00 task-forcën për zgjedhjet. Në njoftim thuhet se mbledhja bëhet pas shqetësimeve të ngritura nga subjektet politike pranë Zv. Kryeministres. Konkretisht shqetësimet e LSI, pasi është i vetmi subjekt që ka denoncuar publikisht dhunimin e militantëve të saj nga eksponentë të PS-së.
Rendi i ditës do të jetë si më poshtë:
1. Informacion lidhur me rastet e dhunës gjatë fushatës zgjedhore dhe aktivizimin e elementëve kriminalë për të mbështetur subjekte politikë;
2. Raportim i posaçëm, të informacionit për kanosje të drejtuesit të subjektit politik LSI, Dega Berat, Z. Krenar Shehu si dhe për rastet e dhunës në Pukë, Fushë-Krujë, Lezhë dhe Fushë- Arrëz;
3. Informacion për shitblerje të votës shoqëruar me rastet e identifikuara deri më sot;
4. Informacion për planin e masave të hartuar për trajtimin e incidenteve gjatë fushatës zgjedhore apo ditën e zgjedhjeve;
5. Informacion lidhur me implikimin e punonjësve të Policisë së Shtetit në mbështetje të subjekteve zgjedhore dhe bashkëpunimi me elementë kriminalë, si dhe masat e marra (nëse ka).
