Të rinjtë e FRPD-së në Shkodër, me parulla në duar, të tipit; “Jo monizëm”, “Jo zgjedhje me drogë” dhe “Jo blerjes së votës”, i kanë bllokuar rrugën kryeministrit Edi Rama, duke e detyruar atë të hyjë me helikopter në kryeqendrën e veriut.
Një nga anëtarët e kryesisë së këtij forumi, Ergys Ivziku, ka treguar për Opinion.al disa nga arsyet kryesore se pse vendosen për t’i bllokuar rrugën kryeministrit Rama mesditën e sotme tek Ura e Bahçallëkut, nyja lidhëse me qytetin.
Ivziku, bën me dije se kjo protestë nuk është një vendim i marrë vetëm nga FRPD, por edhe nga shumë të rinj të qytetit të Shkodrës.
Sipas tij, gjithçka ka nisur si rezultat i provokimit që bëri paradite Policia e Shtetit me urdhër të Edi Ramës, duke provokuar mbajtjen e një takimi para bashkisë me arsyen për të paralizuar çdo organizim të saj, por edhe nga fakti i të qenurit person “non grata” në Shkodër.
Një arsye tjetër, jo e parëndësishme, -thotë ai- është edhe bilanci negativ që ka kryeministri me qytetin e Shkodrës. Ivziku kumton se për katër vite, Rama nuk ka bërë asnjë investim për qytetin, pavarësisht se kryeministri nuk lë rast pa përmendur Stadiumin dhe Marubin, dy investime të bëra në bashkëpunim me financime të huaja dhe për më tepër investimet e qeverisë janë minimale.
Ai mendon se përsekutimi i kryeministrit Rama për kryeqendrën e Veriut, vjen për arsyen se Shkodra është një nga qytet që nuk i shërben atij.
Mësohet se menjëherë ka ndërhyrë Policia e Shkodrës, e cila bëri të mundur largimin e protestuesve dhe kalimin e kryeministrit drejt qytetit.
Kryeministri Edi Rama ka paralajmëruar se takimi me të rinjtë e këtij qyteti do të zhvillohet para Prefekturës, ndërsa bëhet me dije, se gjatë paradites ky aktivitet ka sjellë përplasje mes policisë bashkiake dhe asaj të rendit.
