Ish-ministri i Mjedisit, Lefter Koka, po paraqet sot para Gjykatës së Posaçme konkluzionet e mbrojtjes për çështjen e inceneratorit të Elbasanit. SPAK ka kërkuar 10 vite burg për Kokën që me aplikim të gjykimit të shkurtuar nëse shpallet fajtor, do të dënohet me 6.8 vite burg.
Ish-ministri i Mjedisit është vetë i pranishëm për herë të parë në seancë, ndërsa përmes avokatit të tij ka mohuar akuzën e “shpërdorimit të detyrës”.
Avokati ka thënë se Koka ka qenë jashtë shtetit kur janë bërë negociatat me kompanitë e inceneratorit.
“Gjatë kohës që janë bërë negociata me kompanitë e inceneratorit klienti im ka qenë jashtë vendit. Sa i përket procedurës së bërë me negocim pa shpallje, është bërë në kuadër të emergjencës mjedisore të shpallur nga Bashkia e Elbasanit. Në komisionet e ngritura, nuk ishte e përfshirë vetëm Ministria e Mjedisit, por kishte përfaqësues edhe nga ministritë e tjera. Në lidhje me këtë procedim janë pyetur 87 persona, janë vënë 33 numra në përgjim, 8 pajisje pc të Klodian Zotos janë sekuestruar, 11 institucione bankare, dy pajisje pc brenda kantinës së verës, nga të cilat nuk ka dalë asnjë provë direkte që e implikon z. Koka me akuzat”.-tha avokati.
Lefter Koka u arrestua më 14 dhjetor me urdhër të SPAK. Ndaj tij janë 2 masa ‘arrest me burg’, për inceneratorin e Elbasanit dhe atë te Fierit.
