Për të tretën herë radhazi Gjykata e Lartë i thotë “jo” kërkesave të ish-ministrit të Mjedisit, Lefter Koka për lirim nga qelitë e paraburgimit.
Një Kolegj Penal iu përgjigj negativisht dy rekurseve të pavarura nga njëri-tjetri të ish-ministrit të akuzuar nga SPAK për inceneratorët. Kjo do të thotë që Koka do të vijojë të qëndrojë në masën “arrest në burg”, masë që e vuan prej dhjetorit të vitit 2021.
Ish-zyrtari i lartë i argumentoi dy kërkimet për zbutje të masës me problemet shëndetësore, me të cilat nuk ka bindur më herët as gjykatat më të ulëta. Lefter Koka akuzohet nga SPAK për “korrupsion”, “shpërdorim të detyrës” dhe “pastrim të parave”, në dy hetime të veçuara për inceneratorin e Elbasanit dhe atë Fierit.
Këtë javë GJKKO kaloi për gjykim dosjen për Elbasanin, ndërsa pritet të shprehet edhe për tjetrën.
