Kreu i PD, Sali Berisha, ka dalë në konferencën e përjavshme për mediat, ku është ndalur te afera e inceneratorëve dhe te 11 urdhër-arrestet e firmosura së fundmi nga SPAK.
Gjatë fjalës së tij Berisha ka akuzuar SPAK se po tenton të mbyllë atë që ai e cilëson afera e djegsave për t’ua shitur shqiptarëve vetëm si një si shkelje të disa punonjësve.
“SKAP i partisë po bën gjithçka për të mbyllur aferën e djegësave, për t’ua shitur shqiptarëve si aferë e disa punonjësve të kësaj sipërmarrje gjigande krimi ekonomik të Ramës, Agaçit, Ahmetit, Veliajt dhe Lefter Kokës. Gjithçka, çdo hap që bëhet, bëhet me qëllimin e vetëm për të mbrojtur Ramën nga krimi që ka kryer. Inceneratorët janë sipërmarrje direkte e Ramës, Agaçit, Ahmetit, Veliajt dhe Lefter Kokës. Janë sepse Edi Rama për të mbushur thasët me euro, për të përvetësuar së bashku me grupin e tij mafioz të përbërë nga personat që numërova, pranoi të firmosë në kundërshtim flagrant me ligjet e vendit, në kundërshtim flagrant me qëndrimin e autoritetit kombëtar të prokurimeve publike, i cili i thotë me shkresë që procedura “negociatë e mbyllur” nuk ekziston në ligjin shqiptar, ekziston vetëm në kodet e mafies”, tha Berisha.
Më tej Berisha akuzoi kryeministrin Rama se është përgjegjësi kryesor për Inceneratorët pasi ka pranuar të firmosë një kontratë për veten e tij.
“Pavarësisht nga kjo shkresë pangopshmëria për vjedhje e shtyn kryeministrin e vendit të firmosë fap fap fap. SKAP i partisë përpiqet të mbulojë këtë krim të shëmtuar të Ramës, Ahmetit, Agaçit, Veliajt, përpiqet ta mbulojë, por nuk e mbulon dot se përveç firmës anti-ligjore që Rama vendosi për ndërmarrjet e tij, ai vendosi së bashku me Agaçin dhe Ahmetin të fusë duart e tij të zeza në fondin rezervë të KM dhe të transferojë para në ministrinë e Mjedisit për inceneratorin. Rama është përgjegjësi kryesor sepse ka pranuar të firmosë një kontratë për veten e tij”-tha Berisha.
