7 Marsi, dita e mësuesit e gjeti kryetarin e Bashkisë së Tiranës, Erion Veliaj në zonën e Don Boskos ku mori pjesë në inaugurimin e kopshtit më të ri në kryeqytet.
Duke uruar mësuesit dhe edukatoret për festën e tyre, kryebashkiaku Veliaj tha se Tirana nuk ka patur asnjëherë më parë një kohë më të mirë për shkollat, koshtet dhe çerdhet.
“Këtu ka qenë një landfill i madh. Njësia 9 fillonte tek rrethrrotullimi që quhej sheshi “Skënderbej” dhe mbaronte te “Bregu i Lumit”. Sot në mes të kësaj hapësire kemi ndërtuar dhe rindërtuar shumë shkolla, si shkolla “Jeronim De Rada”, shkolla “Hasan Vogli”, “Qazim Turdiu”, 2 shkolla fantastike, dhe qershia mbi tortë është ky kompleks”.
Ai tha se ky investim është një tjetër përgjigje për ata që kritikojnë bashkinë për mungesën e investimeve në infrastrukturën arsimore.
“E gjithë kjo punë shpërblehet, jo kur dëgjon zhurmën e cic-micit: “Jo, po s’është bërë asnjë shkollë” – se kush ka sy dhe kush di të numërojë me gishta, i numëron dhe dalin mbi 40. Thelbi është që të sigurohemi që çunat dhe gocat që do çojnë përpara Shqipërinë dhe Tiranën nesër, të jenë rritur mirë.”
E pranishme në këtë ceremoni ishte edhe ministrja e Shëndetësisë, Ogerta Manastirliu, e cila falenderoi kryetarin e Bashkisë së Tiranës për punën e bërë për çerdhet, kopshtet dhe shkollat e kryeqytetit dhe jo vetëm.
