Në Famullinë e Shën Prendas, në Juban të Shkodrës, është inauguruar një tjetër investim i Federatës Shqiptare të Futbollit sa i përket terreneve sportive. Presidenti i FSHF-së, Armand Duka, mori pjesë në ceremoninë e inaugurimit të fushës me bar sintetik.
Numri 1 i futbollit në vend, u njoh nga afër me investimin e fushës me bar sintetik, ndërsa në fjalën e tij, Duka theksoi rëndësinë e futbollit për edukimin e fëmijëve dhe shëndetin e tyre.
Presidenti përmendi dhe rolin historik të Jubanit dhe Shkodrës në lindjen e futbollit në Shqipëri, duke e cilësuar këtë si një hap të rëndësishëm për komunitetin dhe sportin, veçanërisht për vajzat.
“Në radhë të parë unë dua t’ju falënderoj ju për interesin e madh që keni për përmirësimin e kushteve, përmirësimin e jetesës së zonës dhe në të njëjtën kohë për kujdesin që ke që edukimin mirëqenien e zonës ta bashkoni me sportin. Është e vërtetë që futbolli ka një fuqi magjike, këtu sinergjitë tona bashkohen, të kishës dhe futbollit për të realizuar qëllimin e përbashkët që kemi, për t’i edukuar sa më mirë fëmijët, për t’i bërë sa më të shëndetshëm dhe sa më të dobishëm për shoqërinë dhe familjen. Ju falënderoj shumë për investimin që kemi bërë bashkë, për fushën e futbollit, që do t’i shërbejë jo vetëm fëmijëve të Famullisë dhe të shkollës, por edhe fëmijëve të gjithë zonës.
Në këtë zonë, në Shkodër dhe pikërisht nga një prift ka lindur futbolli në Shqipëri. Nuk është hera e parë që vijmë në Juban, pasi kemi qenë në inaugurimin e një tjetër projekti, jemi sot dhe në asnjë rast nuk do të themi jo, por do të jemi bashkëpunues për të mirën e komunitetit, për të mirën e fëmijëve dhe aq më shumë të vajzave. Ju falënderoj për organizimin e kësaj ceremonie”, tha presidenti Duka.
Me ndërtimin e kësaj fushe, në Juban është krijuar një hapësirë e re sportive për banorët e zonës, e cila pritet të ndikojë pozitivisht në zhvillimin e jetës sportive dhe sociale të komunitetit.
