Sekretari i Përgjithshëm i OKB-së Antonio Guterres ka bërë thirrje që kompanive të naftës dhe gazit t’u vendosen taksa të veçanta.
Komentet e tij vijnë pasi rritja e çmimeve të energjisë të shkaktuar nga lufta në Ukrainë i shtyn fitimet e industrisë në nivele të reja. Guterres tha se ishte “imorale” që këto firma të përfitonin nga kriza.
BBC News shkruan se pushtimi rus i Ukrainës në shkurt ka përkeqësuar mungesën globale të naftës dhe gazit, duke ndërprerë aksesin në naftë dhe gaz nga Rusia dhe duke rritur çmimet.
Ndërsa, familjet po përballen me fatura më të larta të energjisë, kompanitë po korrin përfitime.
Kompania ‘BP’ raportoi së fundmi fitimin e saj më të madh në 14 vjet, ndërsa fitimet e Shell në periudhën prill-qershor arritën një rekord. Së bashku, katër nga firmat më të mëdha të energjisë, Exxon, Chevron, Shell dhe TotalEnergies fituan rreth 51 miliardë dollarë në tremujorin e fundit që është pothuajse dyfishi i asaj që fituan në të njëjtën periudhë të vitit të kaluar.
Specialistët e energjisë shohin se fitimet rriten me rritjen e faturave “Kjo lakmi groteske po ndëshkon njerëzit më të varfër dhe më të cenueshëm, ndërsa shkatërron shtëpinë tonë të vetme të përbashkët,” tha Guterres.
“Unë u bëj thirrje të gjitha qeverive të tatojnë këto fitime të tepërta dhe të përdorin fondet për të mbështetur njerëzit më të cenueshëm në këto kohë të vështira”, shtoi ai.
Muajin e kaluar, Mbretëria e Bashkuar miratoi një taksë 25% për firmat e energjisë, një taksë e vetme që qeveria thotë se do të mbledhë rreth 25 miliardë paund për të ndihmuar në kompensimin e faturave të energjisë shtëpiake, të cilat janë rritur.
Disa vende të tjera, si Italia, kanë vendosur masa të ngjashme.
“Politikbërësit duhet të fokusohen në rritjen e furnizimit me energji dhe uljen e kostove për amerikanët. Vendosja e taksave të reja në industrinë tonë do të bëjë të kundërtën dhe vetëm do të dekurajojë investimet në një kohë kur është më e nevojshme,” tha ai.
Guterres paralajmëroi se çmimet e larta të energjisë do të kishin pasoja të ndryshme, pasi familjet dhe qeveritë në mbarë botën janë vënë nën presionin./Opinion.al
