Ish-ministri Arben Imami, sot, në një lidhje direkte për emisionin Opinionin është shprehur se kryetari i Partisë Demokratike, Lulzim Basha duhet të japë dorëheqjen nga drejtimi i partisë, pasi rrezikohet humbja e thellë në zgjedhjet e 25 Qershorit.
Imami theksoi se lista e paraqitur nga kreu Basha nuk është e vlefshme në një kuptim, pasi ai ka thyer statutin e partisë. Sipas tij, kjo nuk kishte ndodhur më parë, gjithmonë lista ishte konsultuar me kryesinë drejtuese.
Më tej, ai deklaroi se nuk e priste të ishte jashtë listës së PD-së. Imami tha se është e papërfytyrueshme që të largohej pa paralajmëruar.
“Unë nuk kam lindur deputet. Nuk kam pasur asnjë mërzitje, por vetëm një habi të vetme. Në orën 00:00, është shkatërruar PD-ja. Do flasim pas datës 25 qershor. Gjendja nuk është krijuar për fatin tim, gjendja është akumuluar gjerësisht. E vetmja masë këtu është vetëm ndaj personit përgjegjës. Ai ka shkelur statutin, që lista duhet konsultuar me kryesinë e drejtuese. Mendoj se zgjidhja e vetme është largimi i Partisë Demokratike, Lulzim Basha. Partia mund të dalë shumë keq në zgjedhje. Ky është problemi. Unë kam shtruar një problem politik, i cili është brenda partisë Demokratike. Lista nuk është e vlefshme në një kuptim, ajo nuk është konsultuar”, tha Imami.
