Përplasja në distancë mes Presidencës dhe qeverisë vazhdon… Presidenti Ilir Meta ka publikuar mëngjesin e kësaj të marte kthimin për rishqyrtim në Kuvend të ndryshimeve në aktin normativ me fuqinë e ligjit “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”.
Në një sqarim të detajuar 6 faqesh, kreu i shtetit thotë se ky ligj i paraqitur për shpallje është një nismë ligjore e nxituar, jo e plotë dhe fryma e këtij ligji shkon në kundërshtim me kuadrin ligjor aktual në fuqi, pasi kalimi i pronës shtetërore në pronë private drejtohet nga Ministria e Ekonomisë e Financave, ndërsa me ndryshimet e reja, këtë rol e merr Këshilli i Ministrave.
Pikërisht ky delegim tek organi i Këshillit të Ministrave, thuhet në sqarimin e Presidentit është i ndaluar, sipas parashikimeve të ligjit të vitit 2001, i cili kërkon që pronat e paluajtshme publike apo pronat e paluajtshme të shtetit tjetërsohen ose jepen në përdorim sipas mënyrave dhe kufijve të përcaktuar me ligj, dhe jo me vendim të Këshillit të Ministrave.
“Kjo situatë, krijon një mbivendosje të asaj që lejohet dhe asaj që ndalohet midis normave rregullatore të nivelit të njëjtë, pra me ligj. Kjo gjendje konkurruese midis normave ligjore krijon rrezikun që në praktikë të krijohet konflikt institucional midis institucioneve shtetërore që zgjedhin ti referohet dispozitave të ndryshme të ligjit për të njëjtin fakt, apo mundësi të keq-zbatimit në praktikë të normës të sapo miratuar”, thuhet në relacionin arsyetues të Presidentit.
Gjithashtu, Meta ka vendosur të mos dekretojë edhe ligjin “për vetëqeverisjen vendore”, pasi, sipas Presidentit, ndërhyrjet e bëra krijojnë kompetenca për Këshillin Bashkiak që më parë nuk ishin parashikuar në ligj.
“Presidenti i Republikës, konstaton se Kuvendi i Shqipërisë, me ndryshimet që ka vendosur të realizojë nëpërmjet nenit 3 dhe 4 të ligjit nr. 38/2019, po krijon një kompetencë të re për autoritetet vendore, por nuk ka parashikuar asnjë dispozitë mbi mënyrën ligjore se si këto autoritete (Këshillat Bashkiakë) do të formojnë vullnetin e tyre për të përzgjedhur subjektin me të cilin do të hyjnë në marrëdhënie për të zhvilluar pasuritë e paluajtshme në pronësi të tyre. Kjo gjendje paqartësie, krijon shteg për abuzim dhe mundësi që në praktikë kjo kompetencë e re të keqpërdoret me pasoja të pariparushme për pronën publike dhe interesin publik”.
Një ditë më parë Presidenti Ilir Meta ka rikthyer në Kuvend ndryshimin në ligjin “për rezervat materiale të shtetit”, i cili u miratua më 20 qershor. Sipas këtij ndryshimi në ligj, procesi i lëvrimit të mallrave rezervë të shtetit që bëjnë pjesë në grupin A, i cili më parë bëhej me vendim të Këshillit të Ministrave, aktualisht kthehet në vendimmarrje individuale të Kryeministrit./ Opinion.al
