Presidenti Ilir Meta nuk ka pranuar të dekretojë ligjin për ndryshimet në vettingun në polici, duke e rikthyer për shqyrtim në Kuvend. Në faqen e Presidencës është publikuar vendimi i Metës, së bashku me shpjegimin përkatës.
Presidenti argumenton se ligji ekzistues për vettingun në polici është miratuar me konsensus nga të gjitha forcat, me 88 vota pro, 32 abstenim dhe 1 kundër, duke shtuar se ndryshimet e bëra në këtë ligj, cenojnë parimet dhe standardet e vendosura në ligjin ekzistues nr. 12/2018.
“Ndryshimet e miratuara me këtë ligj nuk krijojnë garancitë e nevojshme se një proces kaq i rëndësishëm si vlerësimi kalimtar i punonjësve të Policisë së Shtetit dhe të Gardës së Republikës, do të realizohet në kohën e duhur, me objektivitet dhe paanshmëri, duke bërë hapa pas në raport me standartet e ligjit në fuqi”, shkruhet ndër të tjera në argumentimin për rrëzimit e ndryshimeve në ligj.
Gjithashtu, në arsyetimin e presidencës thuhet se mekanizmi sipas të cilit punonjësit e Shërbimit për Çështjet e Brendshme dhe Ankesat (SHÇBA) do të kryejnë vlerësimin kalimtar të punonjësve të Policisë së Shtetit dhe të Gardës së Republikës në fazën e dytë dhe të tretë, nuk garanton standardin e vendosur për realizimin e këtij procesi me objektivitet, pavarësi dhe paanshmëri.
Duke analizuar ndryshimet në ligj, Presidenca thotë se: “Këto ndryshime në ligj krijojnë bindjen se, qëllimi real i qeverisë në ndërmarrjen e kësaj nisme ligjore nuk është zvogëlimin i kostove financiare për realizimin e këtij procesi, por vullnet i shprehur i saj, për ta kontrolluar këtë proces nëpërmjet një strukture vlerësuese në varësi të saj, siç është Shërbimi i Çëshjeve të Brendshme dhe Ankesave, strukturë aktuale kjo drejtëpëdrejt në varësi të funksionit politik të Ministrit të Brendshëm, pra të qeverisë.”/Opinion.al
