TIRANE- Kryetari i Kuvendit i është përgjigjur interesimit të medias lidhur me ngërçin e reformës në drejtësi. Meta thotë se bëhet fjalë për ndasi të vogla teknike. Ai shpreh bindjen se konsensusi është solid dhe reforma do të miratohet.
Pjesë nga bashkëbisedimi i Metës me gazetarët në Kryesinë e Kuvendit
Meta: “Jam i bindur se do përfundojë me sukses miratimi i paketës së ndryshimeve kushtetuese për reformën në drejtësi. Baza e konsensusit është solide: Për të shkundur sistemin e drejtësisë përmes një reforme të thellë. Të gjithë e kanë pranuar dhe e vlerësojnë raportin dhe rekomandimet e Komisionit të Venecias si bazë referimi dhe të certifikimi të sandardeteve të mira europiane. Na duhet më shumë vullnet për të qenë më racional dhe për të bërë interpretim objektiv”.
PD dorëzoi mbrëmë një dokument me 11 kushte a do e mbështesë LSI?
Meta: “Nuk kemi të bëjmë me 11 kushte, por 10 çështje që PD synon të zgjidhen. Sipas meje reforma do të mbyllet pasi për çdo çështje kemi rekomandimet e Komisionit të Venecias. Të gjithë ata që kanë pritur që dje të mbyllet reforma janë nxituar, pasi reforma do të vazhdojë të diskutohet.
Jam dakord me atë që tha edhe Spartak Braho se për 90 për qind të çështjeve ka dakordësi. Ndërsa për disa të tjera duhet vlerësim dhe interpretim më objektiv.
Qendrimi i LSI është që kjo reformë duhet të përmbyllet sa më shpejt me standarde të Komisionit të Venecias dhe duke demonstruar të gjithë vullnetin për të lexuar rekomandimet në mënyrë më funksionale. Për ta mbyllur këtë reformë sa më parë, për çështje të caktuara mund të ndërhyjë edhe EURALIUS e OPDAT. Pra i kemi mundësinë për konseunsus”. /Opinion.al
