Presidenti Ilir Meta ka njoftuar nëpërmjet zëdhënësit të tij Tedi Blushi, se në korrik të vitit 2022 do të rikthehet në LSI për të marrë kartën e anëtarësimit qnë partinë që vetë themeloi.
Lajmin e ka bërë të ditur Blushi përmes një njoftimi në rrjetet sociale, teksa ndër të tjera thekson se Meta e ka pranuar faljen e kryetares së tanishme të LSI-së, Monika Kryemadhi dhe e ka falënderuar këtë të fundit.
Ndër të tjera vetë Meta ka vlerësuar fushatën e LSI, teksa e ka konsideruar atë si një fushatë të ndershme.
Postim i plotë:
Presidenti i Republikës, Sh.T.Z Ilir Meta falenderon Kryetaren e LSI, znj.Monika Kryemadhi për reflektimin e saj lidhur me lënien e mandateve dhe bojkotin e zgjedhjeve vendore, që e mbifuqizuan pushtetin e Kryeministrit dhe i lehtësuan bërjen e shumë ligjeve korruptive me porosi dhe në interes vetëm të oligarkëve dhe blerjes së zgjedhjeve.
Presidenti Meta vlerëson fushatën e ndershme dhe model të LSI dhe sidomos rreth 110 mijë qytetarët, të cilët i rezistuan presionit të mafies, bandave, diskriminimit mediatik, survejimit dhe presioneve policore.
Presidenti Meta shpreh keqardhjen për tjetërsimin masiv të votave, por kjo ishte e pritshme, për më tepër, që nuk u morrën masat e duhura për parandalimin e këtij krimi të rëndë zgjedhor.
Presidenti Meta në respekt të sakrificave për demokracinë, që ka bërë LSI, i njofton të gjithë anëtarët dhe simpatizantët e saj se më 24 korrik 2022 do të rikthehet për të marrë kartën e anëtarësisë së LSI dhe do t’u bashkohet përpjekjeve të të rinjve dhe të rejave për Shqipërinë e Shqiptarëve./Opinion.al
