Ashtu siç kishte paralajmëruar, Presidenti Ilir Meta u paraqit në Komisionin Hetimor, i ngritur për shkarkimin e tij, në orarin e caktuar. Rrugën nga Presidenca deri në Kryesinë e Kuvendit e bëri në këmbë, shoqëruar nga këshilltarët e tij. Pa arritur në kryesinë e Kuvendit, Meta theksoi se do të jetë në krye te shtetit shqiptar deri në fund të mandatit të tij, siç tha ai për të mbrojtur Kushtetutën.
I pari që nisi seancën dëgjimore, ishte kryetari i këtij Komisioni Hetimor. Presidenti Ilir Meta, me qetësinë që e karakterizon iu përgjigj pyetjeve të deputetëve të këtij Komisioni. Ajo që bëri më shumë përshtypje në deklaratat e tij, ishte informacioni “sekret” i publikuar.
Presidenti ka pasur informacione nga institucionet e sigurisë për përpjekje për të organizuar akte destabilizimi në vend. Në mënyrë të veçantë më datë 7 qershor, Presidenti ka marrë një informacion që është sekret dhe i klasifikuar.
“Kam pasur informacione të besueshme se persona të caktuar do shfrytëzonin mitingun e opozitës në 8 qershor për djegien e kuvendit të Shqipërisë, prandaj kam anuluar dekretin e 30 Qershorit”, tha kreu i shtetit.
Si argument të parë, për dekretet e tij Ilir Meta përmendi Gjykatën e Strasburgut.
“Gjykata Ndërkombëtare në vitin 2015 ka marrë një vendim të ngjashëm ndaj Bullgarisë për një shkelje të vitit 2009. Në arsyetimin e gjykatës thuhet se e drejta e votës e garantuar nga neni 3 e protokollit nuk është e limituar në zgjedhjen e një kandidatit. Vota duhet të garantojë të drejtën e zgjedhjes në të kundërt zgjedhësit do i mungonte e drejta e tij. Presidenti me dekretin e tij ka mbrojtur të drejtën e zgjedhjes së qytetarëve shqiptarë. Nëse presidenti e ka respektuar apo e ka mbrojtur të drejtën e zgjedhjes”, u shpreh Meta.
Kritika të forta bëri ndaj kryeministrit Edi Rama si dhe ndaj liderit të opozitës, Lulzim Basha. Ai tha se anuloi zgjedhjet pasi nuk mundi t’i ulte dot palët në dialog!
“E para ishte kokë fortësia e Ramës për të mos shtyrë 30 qershorin dhe e dyta ishte kokëfortësia e Bashës për të mos u ulur në tryezë. Opozita ishte larguar nga Kuvend. Ishte i papranueshëm kushti i Bashës që nuk pranonte të ulej në tryezë me kreun e shtetit. Pas deklaratës së Bundestadgut gjerman i cili bënte thirrje për garantimin e zgjedhjeve të lira dhe të ndershme, unë e kam përshëndetur duke treguar gatishmërinë për të caktuar një datë tjetër pas dakordësimit të palëve. Kjo gjë nuk ndodhi. Dhe më pas kam anuluar zgjedhjet sepse është e qartë që me afrimin e datës 30 qershori, edhe OSBE e thotë se konfrontimi në vend po vinte duke u rritur. Pas kësaj date, pavarësisht retorikës në media, konfrontimet janë ulur. Nuk është hera e parë qenë një presidenti cakton një datë të re zgjedhjesh. Kjo ka ndodhur 5 herë, jo në situata normale. Para se ta bëja dekretin u konsultova por kur mora këtë vendim, situata ishte e çmendur. Opozita thoshte se nuk mban përgjegjësi për veprimet e popullit që e ke thirrur vetë, po nga na tjetër nuk isha dakord me anti-mitingjet e opozitës pa marrë parasysh se ka përgjegjësi më të madhe për sigurinë në vend dhe pa marrë parasysh se gjuha e tij acaronte protestuesit. Çfarë mund të bënte presidenti, nuk mund të priste që të humbte jetën një punonjës policie apo një qytetar. As një nga dy palët nuk do mbante përgjegjësi. Kjo do ta përshkallëzonte më tej atë krizë e cila nuk ishte në interes të vendit. Ditën e shtunë pasi u njoha me rrezikun që manifestimi i 8 qershorit do përdorej për të djegur kuvendin me 8 qershor, e them me bindje se kam bërë veprimin më të mirë. Kur të dy palët kishin një marrëveshje për konfrontim ishte detyra ime për t’u dhënë mundësi të dy palëve të reflektonin. Kam nisur menjëherë diskutimet. Jam takuar dy herë me Milon për të rënë dakord për një datë zgjedhjesh. E kam takuar me dëshirën për t’i sqaruar atij dhe aleatëve të tij se anulimi i 30 qershorit nuk ishte emocionale”, u shpreh Meta.
Ilir Meta është i pari President që dëshmon në një Komision Parlamentar. Kreu i shtetit u rikthye në Kuvend, prej nga ku për 4 vite radhazi, deri në 2017-n, orientoi planin e punës dhe vendimmarrjen e Parlamentit, si kryetar i tij./ Opinion.al
