Përmes një konference për shtyp Presidenti i Republikës Ilir Meta ditën e sotme firmosi dekretin për shfuqizimin e datës së zgjedhjeve lokale në Shqipëri.
Ai rreshtoi njësërë arsyesh se përse zgjedhjet nuk mund të zhvillohen më datë 30 qershor, ku më kryesoret ishin situata politike në vend si dhe mos marrja pjesë në zgjedhje të opozitës.
Pas fjalës Metës, Kryeministri Edi Rama mblodhi Kryesinë e Partisë Socialiste, ku u mor vendimi që ditën e enjte në Parlament do të nisnin procedurat për shkarkimin e Metës nga posti i Presidentit.
Në përgjigje të këtyre zhvillime Presidenti Meta u shpreh nga një Universitet në Prishtinë ku takoi studentë e petagogë se ai do të mbronte Kushtetutën.
“Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona.
Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari,”-u shpreh Meta në një postim në Facebook.
Postimi i plotë i Presidentit Ilir Meta në Facebook:
“Në këtë ditë të veçantë për kombin tonë, në 141-vjetorin e Lidhjes Shqiptare të Prizrenit dhe në prag të kremtimit të 20-vjetorit të çlirimit të Kosovës, pata kënaqësinë e veçantë të zhvilloja një takim të ngrohtë e vëllazëror me një grup studentësh e profesorësh nga të gjitha trevat shqiptare.
I lumtur të ndanim qëndrimin se rinia duhet të jetë promotore e proceseve demokratike dhe integruese në të dy vendet tona dhe se është shumë e rëndësishme që Shqipëria e Kosova të forcojnë bashkëpunimin në të gjitha fushat.
Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona.
Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari.”/Opinion.al/
