Inspektoriari i Lartë i Deklarimit dhe Kontrollit të Pasurive deklaron se ka nisur kontrollin e plotë dhe hetimin administrativ të pasurisë së deputetit socialist, Alfred Peza. Ai është aksioner me 1% në Bankën Credins. Aksionet në këtë bankë janë blerë rreth një vit më parë nga bashkëshortja e tij, Mirela Ndini e cila është punonjëse e Ministrisë së Jashtme.
ILDKPKI bëri të ditur sot se “nisur nga njoftimet e mediave në lidhje me blerjen e aksioneve në bankën Credins nga bashkëshortja e deputetit, me vlerë rreth 1,13 miliardë lekë ka urdhëruar fillimin e procedurave të kontrollit të plotë dhe hetimit administrativ për të gjitha deklaratat e interesave private që prej vitit 2003, të subjektit Alfred Peza”.
Objekt i këtij kontrolli nuk do të jenë vetëm pasuria e Pezës por edhe burimet e krijimit dhe gjendja e konfliktit të interesit. Hetimi administrativ do të shtrihet edhe për familjarët, bashkëshorten e tij, fëmijët, si dhe personat e lidhur.
Alfred Peza ka qenë për shumë vite gazetar dhe drejtues mediash, si në gazetën Korrieri, gazetën Shqip, Tv Oranews, Vizion+, etj. Në vitin 2013 ai u fut nga Edi Rama në listat e deputetëve për qarkun e Elbasanit, dhe konkretisht mbulon zonën e Peqinit.
Lajmi për pasurinë e tij u publikua të premten e kaluar nga portali CityNews dhe më pas në gjithë mediat e tjera. Në një reagim në facebook Peza nuk i mohoi aksionet në bankë. Ai tha se janë paratë e kursyera në vite nga familja, pra ai dhe bashkëshortja.
