Para pak muajsh emisioni “Stop” në Tv Klan transmetoi mungesën e ilaçit “Viread” që është alternativë e “Tenofovir”, për të cilin “Stop” u interesua së fundmi.
“Tenofovir” përdoret nga pacientët me Hepatit B, por nuk gjendet në farmacitë e spitaleve, pasi këto spitale nuk kanë më kontratë me Fondin e Sigurimit.
Problemi është, që edhe farmacitë që kanë kontratë me Fondin, nuk e kanë këtë medikament. E vetmja farmaci, që e disponon, e ka me emër tjetër dhe me çmim të papërballueshëm.
“Unë kam babain i cili merr këtë ilaçin “Tenofovir”, i cili është për të sëmurët me Hepatit B dhe C. Ka probleme mëlçinë dhe babai im duhet të marrë një pako për një muaj. Kam shkuar tek farmacia e spitalit në fillim, aty më thanë që nuk e kemi këtë ilaçin me rimbursim, por e kanë këto farmacitë e tjera që janë me kontributet shoqërore. Kam shkuar tek këto farmacitë e tjera dhe më thonë që nuk gjendet, pasi është në mungesë tregu. Kurse një farmaci tjetër na sugjeroi një ilaç tjetër që kushtonte 100 e ca mijë lekë, që është pothuajse i njëjtë pak a shumë si ky i joni. Është shumë shtrenjtë, nuk e marrim dot. Deri tani jemi zhytur në borxhe, por problemi është që të gjendet një zgjidhje”, tha një denoncues.
“Stop” iu drejtua me një kërkesë për sqarim Fondit të detyrueshëm të Sigurimeve Shëndetësore, ku u tha se do të përgjigjen me email.
Fondi: E kemi marrë kërkesën tuaj dhe e kemi çuar për shqyrtim në sektorin përkatës dhe shumë shpejt do të keni një përgjigje po në e-mail. Paraprakisht po të them, që po bëhen përpjekjet, që javën tjetër do të jetë.
