Efektivat e Drejtorisë Vendore dhe të Komisariatit të Policisë Durrës në bashkëpunim me Punonjësit e Drejtorisë Vendore të Tatimeve dhe Inspektoriatin e Shëndetit Publik, mbrëmjen e 12 gushtit deri në orët e para të mëngjesit të ditës së shtunë kanë ushtruar kontrolle në akset rrugore kryesore/dytësore, në lokale të ndryshme dhe kryesisht në lokalet e natës, tallava, me qëllim ndëshkimin e shkelësve të ligjit, sekuestrimin e sendeve të paligjshme, armëmbajtje pa leje, drogë, kapjen e personave në kërkim dhe me precedentë penalë, ushtrimin e aktivitetit ekonomik në respektim të dispozitave ligjore me qëllim mbajtjen nën kontroll të situatës kriminale dhe rritjen e sigurisë së qytetarëve.
Sipas policisë, “është ushtruar kontrolle në 6 lokale nate, ndaj të cilëve u mor masa e gjobës për shkelje të ligjit antiduhan në ambientet e brendshme”.
Në lokalet ku ka ushtruar kontroll, policia ka shoqëruar për në ambientet e komisariatit 14 shtetas për verifikim, 6 prej të cilëve ishin balerina në lokalet e natës.
Njëra prej shtetaseve femra të shoqëruara, gjatë verifikimeve, rezultoi se ishte e shpallur në kërkim, pasi ishte larguar nga banesa. Bëhet fjalë për shtetësen B.M. 18 vjeçe, banuese në Tiranë.
Për veprime të mëtejshme, kjo shtetase iu dorëzua Efektivave të Komisariatit të Policisë Nr.6 Tiranë.
Policia e Durrësit informon se kontrolle të tilla do të vazhdojnë edhe në ditët në vijim, përgjatë gjithë sezonit turistik me qëllim rritjen e parametrave të sigurisë duke vënë para përgjegjësisë ligjore çdo shkelës të legjislacionit në fuqi.
